الجمعة، ٢٦ مارس ٢٠١٠

بيزنس مراجعة الدرجات في جامعة الفيوم



ورقة ملصقة في كل مكان بالكلية بعد ظهور النتائج مكتوب عليها " مراجعة رصد الدرجات بـ20 جنيه و إعادة تصحيح المادة بـ100 جنية "

يعني إيه؟
يعني من الآخر لو انت زعلان ومش عاجبك درجاتك وحاسس إنك مظلوم ومهضوم حقك وتقديرك بقى في الحضيض ومش ده مستواك يبقى.... .. لا متفهمنيش صح

الورقة بتقول : إيدك على المعلوم وانت تتراجع ورقتك أو يعاد رصد درجات ، والمعلوم لفى مكتوب فوق 20 أو 100 بس .. مش كتير .. صح ؟

بصراحة كده بقت حاجه تفقع حتى حقنا المهضوم في الدرجات عشان نرجعه لازم ننفض جيوبنا وندفع ، كل حاجه في البلد والجامعة والشارع والحارة بقت شعارها : من أجلك أنت .. هبيعك انت والي مش عاجبه نشوفله جلاد يعاتبه ويخليه يعجبه ويعجب اللي خلفوه

يعني حتى مراجعة الورقة بقت بزنس طيب ومين المستفيد ؟؟ ومين اللي هيكسب لو الطالب مظلوم فعلا ومش قادر يدفع إعادة تصحيح الدرجات ؟؟

ياترى العميد هيستفيد ؟ ولاّ رئيس الجامعة هيستفيد ؟ ولاّ الجامعة هيسفيد ؟ ولاّ مصر هتستفيد ؟

طيب مين المستفيد من التجاره بالبشر دي ؟ وهل يدي خطوة في طريق إنهاء مجانية التعليم اللي بيزلونا بيها ؟ ولا ده طريق الخصخصة واللي مش عاجبه ميتعلمش ؟

أسئلة كتيره لكن مين يجاوب ؟؟؟

ليست هناك تعليقات: