بصراحة الموضوع ده عمال يلح علي أكتبه من زمان
وأنا مش عايز لكن مش عارف أمنع نفسي من التفكير فيه بداية الإلحاح
ده كان من أكثر من أسبوع بالتحديد يوم مجلس التأديب
اليوم ده حدث لينا حاجة صغيرة أوي ولكن عمال أفكر فيها من ساعتها
أول حاجة كان محامي الكلية اللي كان طول السنة مش بيقدر يتكلم عمال يقولنا
روحوا هنا ... قفوا بعيد عن المكتب ... مفيش صوت ... روحوا فين ... هاتوا الكارنيهات ... لأ هاتوا البطاقات
كان شايف نفسة أوي علينا وده خنقنا أوي
والموضوع ده مش مؤثر أوي ومش هو المهم
المهم هو إن عميد الكلية بعد ما سألنا سؤالين خارج المقرر
قالنا أنا هكون أرأف بيكم من نفسكم ومش همنعكم من الإمتحانات
( اللي مش عارف إحنا كنا بنمتحن ومجلس التأديب كان في وسط الإمتحانات)
أنا هفصلكم بعد الإمتحانات
تخيلوا بقي كان ردنا إحنا إيه
هو ده المصيبة الكبري !!
إحنا قلنا له شكرا يادكتور
وللأسف كلنا قلنا كده مع بعض بتلقائية شديدة
أنا لما فكرت في الموضوع بعدها كنت هتشل
إيه اللي حصل ده
وللتوضيح يا جماعة إحنا مش كنا خايفين ولا حاجة بدليل إنه
سألنا لو رجع بيك الزمن تاني هتعمل اللي عملته ده تاني
وكان الرد من أحدنا إن لو رجع الزمن تاني والحاجة اللي عملتها كانت صح هعملها تاني
واتكلم كمان في دستورية المظاهرات
ورد برده واحد علي العميد وقاله إن ده حقنا الدستوري
ومن حقنا نعمل مظاهرات
وحصل جدال مع العميد في النقطة دي
أنا عايز أقول إن إحنا مش كنا خايفين
وبالتالي أنا عايز أعرف إن إحنا ليه قلنا شكراً بالعفوية دي
أعتقد إن الموضوع كبير أوي
الموضوع موضوع تعود علي الظلم خلاص بقينا واخدين علي الظلم
والكارثة إن إحنا بقينا نرضي بالظلم ونشكر الظالم كمان
نشكره علي إنه ظلمنا !!!!!!!!!!!!
نشكرة علي إنه فصلنا بعد الإمتحانات
نسيت أقولكم إنه فصلنا شهر يبدأ من يوم 26/1 يعني أجازة سعيدة وتبدأ بعدها أجازة سعيدة تاني
والله أنا أكثر حاجة خنقتني هي كلمة شكرا دي !!!!!!
أنا اتكلمت قبل كده في بوست هل سيحدث الإنفجار عن حال الشارع المصري
وهل هيقوم ويثور علي الظالم قريبا ولا لأ
ونسيت إني من الشارع المصري
ولقيتني أنا أولهم
أول من رضي بالظلم
خجلت أمام نفسي عندما رأيت هذا الرضي الغريب
لا أعرف ماذا أقول
غير أننا نحتاج الكثير لنغير أنفسنا قبل أن نتخذ أي خطوة للأمام
المشاركات
.jpg)
هناك ١٨ تعليقًا:
السلام عليكم ورحمة الله وبركاته
اخ مشاكس
موضوع ردك اللى رفضه دا مش زى ما انت فسرته لنفسك
انك متقبل الظلم
لالالالالالالالالا
ممكن اوى نرفضه بنفس الطريقة
بشكرك للعميد دا
عارف لية
زى ما احنا عرفين دى تربية اتربنا نشكر الاكبر منا حتى ولو كان غار على حقنا ولكن لم نستسلم ونطالب بحقنا دا
المهم نعرف اللى ظلمنا مدى تمسكنا بحقنا بس من خلال اطار هو يتكسف بيه انه تعدى علينا
ودا متهيالى حصل منكم بتلقائية
جزاك الله كل خير
اللهم يسر لكم الخير دائما
سلاااااااااام
عاجل الانباء
تم اصدار قرار تجديد الاعتقال للدكتور الزعفراني بعد الافراج عنه مرتين وهو الان في سجن الغربانيات في برج العرب بعدما كان محتجز في الترحيلات
شاركنا في التوقيع علي وثيقه اطلاق سراح الدكتور ابراهيم الزعفراني
لا لا لا ..ولا تعود ظلم ولا حاجة الموضوع كان بتلقائية ولإن أساس دعوتنا الحب والجدال بالحسنى وهذا الموقف ينم عن رقى فى الأخلاق وفهم لفن الحوار
يعنى انتوا قولتلوه شكرا ربنا يجازيه بقه ومش خوف ده أخلاق مسلمين فاهمين ازاى يبرهنوا على نبل رسالتهم ..أصل الغاية انكم تنتصروا للحق وان شاء الله ربنا يجزيكم على نيتكم بخير
بس جميل من حضرتك شغل الجلاد لنفسك ده بس مش بزيادة قوى ..يحسن تقلب من محاسبة نفس لإقعاد همة وفتور عافاكم الله
ربنا يثبتكم على الحق ويستعملكم ولا يستبدلكم ويعز بكم الإسلام والمسلمين
السلام عليكم
أنا أظن انكم كان واخدكم الموقف وكنت حاسين ان الدكتور طيب وكويس
مش اكثر
وياريت نتعلم من المواقف وما نكررش الأخطاء تانى
وجزاكم الله خيرا وثبتكم على طريق الحق.
السلام عليكم
حبيبى الغالى ايه ياعمنا انته مقاطعنا ولا ايه
روق كده بس وتعالى نتكلم شويه
بص زى ما الناس الحلوين الا قبلى اتكلموا
هو واجب عليك انك تقوله شكرا تعرف معنى انك تقوله شكرا وهو ظالمك هو هيحس بيها بعد كده لو عنده ضمير زيك وقعد يفكر مع نفسه انا ظلمتهم وردوا عليا وقالوا لى شكرا لو هو بنى ادم زينا يعقل ان دعوتنا دعوة سلام لا عنف واحنا مش بناخد حقنا بالعنف وانا هطرح عليك موقف بسيط وده موقف حقيقى
والله انا مرة واحد بتاع الامن بيقولى افتح الشنطة قلت له لا دى شنطتى الخاصة ورفضت وحصل عناد كبير جدا وجه الاخ المسئول قالى افتحها فتتحتها ليه لاننا تعلمنا كده
وبعدها بتاع الامن ده بيقولى انتوا مفكرين نفسكم وزراء !!!!
ترد تقوله ايه؟؟؟
وبعدين قالى انتوا لو واحد منكم وقع تحت ايدينا احنا هنفرمه مش هنسنمى عليه تعرف رديت عليه قلت له ايه
قلت له انته مش بتطلع تروح لوحدك صح بصلى باستغراب وقالى اه وقلت له انته مش من هنا من بره البلد صح قالى اه قلت له يعنى انته ممكن برده تتفرم فى بلدنا صح !!! سكت مردش
وبعدين رديت عليه وقلت له ده مش منهجنا نحن الاخوان احنا متربناش على كده وعمرنا ما هنلجا لكده
فانت باسلوب الرقيق فى التعامل مع العميد او الامن هتجبرهم انهم يحترموك وفيه مواقف كتير ليس الان مجال لسرده توضح كلامى
واختم بانى اقول لك
احسن من اساء اليكم فلعله يوما يرجع عما فعله
والله يهدى الى صراط السبيل
والسلام عليكم ورحمة الله وبركاته
أخت أمل
وعليكم السلام ورحمة الله وبركاته
أشكرك علي ردك ومتابعتك لمدونتي التعبانة دي
ومازلت أعتقد إن ردنا بالشكر ده كان مش مضبوط
إخواني في مدونة يلا نفضحهم
مشارك معكم إن شاء الله في التوقيع علي الوثيقة ونصركم وأعزكم الله
الأخت خديجة عبد الله
جزاكم الله كل خير
أخي عاشق النيل
أختلف معك تماماً إحنا لا كنا واخدنا الموقف وكمان الدكتور كلنا عارفينه لأنه درسلنا كلنا وكلنا إتعاملنا معاه قبل كده
لكن المشكلة أنا وضحت وجهة نظري فيها
أخي النجم القادم
ربنا يبارك فيك يا حبيبي
وعلش مقصر معاك أوي لكن الظروف والله
وجزاك الله خيرا كثيراً
أخى المشاكس
كلمة الشكر لم ولن تكن ابدا دليل على ضعفكم او رضاكم بالظلم
واول شخص مدرك ان دا مش ضعف هو العميد
وبعدين كلمة شكرا احيانا الواحد بيقولها كتير من غير ما يكون معناها انى راضى على كده
يعنى مثلا لو حصل ان حد ضايقك بكلمة ومحبيتش انك ترد عليه فبتقوله ببساطه شكرا
دا بيكون فقط معناه ان اخلاقى ما تسمحليش انى ارد عليه
السلام عليكم اخى المشاكس
كويس انها جت على فصل شهر الراجل ده كان شكله شرانى فى اليوم ده واعتقد ان مسألة الشكر دى جاءت عفوية نظرا لانك كنت متوقع عقوبة اشد من تلك لكن العقوبة جت اخف مما كنت تتوقع فلذلك جاء الشكر بطريقة عفوية
تحياتى
اخوك مصطفى محمود
السلام عليكم ورحمة الله
بداية أحييك أخي على هذه المحاسبة التي يفتقدها معظمنا...جزاكم الله خيرا
لن أقول رفقا بنفسك..لا لا لا لا لا
ولكن أتمنى من الله عز وجل إن المحاسبة دي دايما تأتي بنتائج إيجابية....مزيد من العمل للدعوة وليس شئ آخر
والخاطرة أحرجتني جدا جدا جدا جدا
بس بجد أنا باردوا بسأل هو احنا ليه طيبين كده...ليه بنرضي بالقليل
أو حتى بنرضى باللا شئ
ولا أقصد حضرتك طبعا...
الموقف يختلف كثيـــــــــــــرا
ولا وجه للمقارنة
ثبتكم الله تعالى وأجازة سعيدة
احنا الاجازة بتاعتنا انتهت النهاردة
ثبتكم الله تعالى...
"ولو عملتوا ايه مش هينفع معانا"
الأخت bent_elbana
جزاكم الله خيرا وبارك فيكم
الأستاذ مصطفي محمود
ايوه يا متر انت فرحان إنها جات علي شهر ما هو لو معانا محامين شاطرين كنا أخدنا براءة مش كده ولا إيه
مش قصدنا حاجة يا متر
متزعلش
الأخت حماس
بارك الله فيكم وثبتنا وإياكم علي طريق الخير والحق
انا موفقاك جدا وكنت دايما بقول صوتى هو اضعف الايمان طيب اذاى هانكلم
موضوع حلو جدا ربنا يكرمك ويبعد عنك المشاكل
الأخت أمة الله
جزاكم الله كل خير علي مروركم الكريم
إرسال تعليق